越搭教學
普通百搭乜都當得；越搭唔同，每一隻都印住自己當得邊啲牌。張枱揀玩邊幾款，打法就完全唔同。
先講清楚：越搭係街坊玩法，每張枱規矩都唔同。以下嘅規矩跟港式台牌 app 嘅預設；開枱前同雀友講定。港式台牌 app 準備加入越搭，推出咗會喺 IG 同 Threads 通知。
越搭同百搭有咩分別
百搭加落副牌嘅額外牌，乜都當得。唔可以用嚟上或者碰，淨係喺自己手牌入面當牌用。 越搭每隻印住一款，只可以當嗰款範圍入面嘅牌。每款要唔要、每款幾多隻，張枱自己揀。
最常見：八搭
未玩過嘅，通常由呢八款開始：皇、筒索萬、筒、索、萬、番、東南西北、中發白。範圍由闊到窄，易明易打。
幾條要講定嘅規矩
- 上、碰用唔用得越搭 —— 預設用得，但每次上或者碰最多用一隻。有啲枱逐款講定邊款用得。
- 真牌優先 —— 兩家爭同一隻牌，用真牌嗰家贏過用越搭嗰家。
- 飛牌 —— 你啱啱摸到嘅真牌，正正係你落咗地嗰組入面某隻越搭代表嘅牌，就可以用佢換走隻越搭返嚟手。換出嚟嗰陣，其他人食得嗰隻真牌，當你出銃。叮咗之後，淨係換完即刻食糊先可以飛。
- 打出去嘅越搭 —— 預設食得糊；有啲枱講明打出去嘅越搭冇人食得，開枱前講定。
- 暗槓 —— 預設可以用越搭，但最多一隻。
- 特殊牌型 —— 越搭喺自己範圍入面，都可以幫你砌十六不搭、十三么、嚦咕嚦咕。
實戰：一副牌點樣用搭
手上十六隻（連一隻搭），摸到東風：
一二三萬 四五六萬 七八九筒 二三四索 中中 ［搭］ 東 ＋摸 東
- 搭係皇或者番：當中，砌成中中中，東東做眼 —— 食糊。
- 搭係萬：當唔到中，呢副牌唔係糊。同一副牌，搭唔同，結果就唔同。
所以越搭嘅打法，第一步係睇清楚自己手上隻搭當得邊啲牌，再決定留邊幾隻牌。
實戰：飛牌一次
- 上家打七筒，你用八筒加一隻「筒」搭上：門前落地係七八九筒，當中九筒係隻搭。
- 幾輪之後你摸到真九筒。呢一刻可以飛：真九筒先亮出嚟。
- 其他人食得嗰隻真九筒，算你出銃。冇人食，真九筒就放入門前嗰組，換返隻「筒」搭返嚟手，下一組又用得。
- 要即摸即飛：九筒放咗入手再過一輪，就飛唔到。叮咗之後，淨係飛完即刻食糊先可以飛。
34 款越搭逐款睇
乜都當得
皇任何一隻牌，花除外。大皇就係佢。
- ✓中中 + 皇 → 中中中
- ✓一三萬 + 皇 → 一二三萬
按門
筒索萬所有筒子、索子、萬子。
筒所有筒子。
索所有索子。
萬所有萬子。
- ✓一三萬 + 萬 → 一二三萬
- ✗中中 + 萬 → 中中中：萬搭當唔到字
番所有番子（字牌）。
- ✓中中 + 番 → 中中中
東南西北東風、南風、西風、北風。
中發白紅中、發財、白板。
按數字
大七、八、九。
中四、五、六。
小一、二、三。
單一、三、五、七、九。
雙二、四、六、八。
一九一、九。
一四七一、四、七。
二五八二、五、八。
三六九三、六、九。
番工六、七、八、九，再加所有番子。
番攤一、二、三、四，再加所有番子。
按位置
卡番所有番子，同埋卡窿（例如一三萬中間嗰隻二萬）。
- ✓一三萬 + 卡番 → 一二三萬（填卡窿）
- ✗一二萬 + 卡番 → 一二三萬：三萬係邊張，唔係卡窿
- ✓東東 + 卡番 → 東東東
伍偏所有五，同埋偏章：一二嘅三、八九嘅七。
- ✓一二萬 + 伍偏 → 一二三萬（三萬係偏章）
- ✗一三萬 + 伍偏 → 一二三萬：二萬唔係五、唔係偏章
- ✓五五萬 + 伍偏 → 五五五萬
斷缺淨係用喺斷么或者缺五嘅組合：坎可以係 234、678、222、333、444、666、777、888；眼可以係 22、33、44、66、77、88。
- ✓當得二萬、七筒
- ✗當唔到五萬、一萬、東
牛睇你手牌連落咗地嘅牌：入面最大嗰個數，同數或者更大嘅筒索萬都當得。
- ✓你手上係三四五六萬：牛當得六萬，亦當得九筒
- ✗同一副牌：牛當唔到五萬 —— 細過你最大嗰個數（六）
- ✓碰九筒之前：牛當得七萬
- ✗碰咗九筒之後：你最大嗰個數變咗九，牛淨係當得九 —— 越食得大，牛越窄
熊睇你手牌連落咗地嘅牌：入面最細嗰個數，同數或者更細嘅筒索萬都當得。
- ✓你手上係三四五六萬：熊當得三萬，亦當得一索
- ✗同一副牌：熊當唔到四萬 —— 大過你最細嗰個數（三）
按座位 —— 馬
馬跟你坐邊個位而變：
東位（莊）：一、五、九 + 東風
南位：二、六 + 南風 + 中發白
西位：三、七 + 西風 + 中發白
北位：四、八 + 北風 + 中發白
南西北三家嘅中發白三隻都當得。莊家一過莊，大家嘅馬跟住變；打出嚟嘅馬，睇嘅係攞佢嗰家嘅位。
東位（莊）：一、五、九 + 東風
南位：二、六 + 南風 + 中發白
西位：三、七 + 西風 + 中發白
北位：四、八 + 北風 + 中發白
南西北三家嘅中發白三隻都當得。莊家一過莊，大家嘅馬跟住變；打出嚟嘅馬，睇嘅係攞佢嗰家嘅位。
- ✓你坐南位：中中 + 馬 → 中中中
- ✗你坐東位（莊）：中中 + 馬 —— 東位嘅馬冇中發白
- ✓你坐東位：一一萬 + 馬 → 一一一萬
- ✓過莊之前你坐東位：馬當得五筒
- ✗過莊之後你變咗坐南位：同一隻馬當唔到五筒，變咗當得二、六同中發白
睇手牌同枱面
聚當得你已經有嘅牌 —— 手牌同落咗地嘅組都計（包括明章）。
- ✓你有一一萬、五筒：聚當得一萬
- ✗同一副牌：聚當唔到二萬 —— 你一隻都冇
獨當得你一隻都冇嘅牌 —— 手牌同落咗地嘅組都冇先算。
- ✓你有一一萬、五筒：獨當得二萬
- ✗同一副牌：獨當唔到一萬 —— 你已經有
現當得枱面已經出現過一次或以上嘅牌，出現咗先當得。持有現都可以開局就叮（天叮、地叮）；枱面一出現啱位嘅牌就食得糊。例如天叮單吊現，有人打出九萬，下家跟住打九萬都食得。
- ✓九索有人打過：現當得九索
- ✗八索未出現過：現當唔到八索
搭嘅搭
複製複製你手上另一隻搭。要落地就只可以複製自己已經落咗地嘅搭；唔可以暗槓。手上淨係得複製、冇其他搭，就當大皇用。
- ✓你手上仲有一隻筒搭：複製當得三筒
- ✗同一副牌：複製當唔到三萬 —— 佢抄嘅係筒搭
- ✓手上淨係得複製：當大皇，五萬都得
創造變成「呢張枱有、但你手上未有」嘅其中一款搭 —— 所以會變成邊款，要睇張枱實際玩緊邊啲搭。唔可以落地，唔可以暗槓。
- ✓張枱玩創造、筒、萬，你手上得創造：可以變筒搭，當三筒
- ✗同一副牌：當唔到東 —— 張枱冇番搭
限住一門嘅數量
確單佢所在嗰一門嘅數量要係單數。
- ✓萬門有四隻真牌 + 確單 → 五隻，單數
- ✗萬門有五隻真牌 + 確單 → 六隻，雙數，食唔到
確雙佢所在嗰一門嘅數量要係雙數。
限五佢所在嗰一門最多五隻。
七起佢所在嗰一門最少七隻。